’s Evangelium noh Johannes,
Kabiddel 15, 1 – 8
De eschde Woischdogg
Isch bin de eschde Woischdogg, un moin Vadder is de Winzer. Jedi Reb an mir, wu kãã Drauwe bringd, nimmd er weg, un jedi, wu Drauwe bringd, machd er sauber, dass se noch mehr Drauwe bringd. Ihr seid schun sauber worre dorsch die Worde, wu isch eisch gsaad hab. Bleibd mid mir zesamme, dann bleib isch aa mid eisch zesamme. Nur wann ihr mid mir zesamme bleibd, kennd ihr Drauwe bringe. Genauso wie e Reb nur Drauwe bringe kann, wann se am Woischdogg bleibd. Isch bin de Woischdogg, ihr seid die Rewe. Wer mid mir zesamme bleibd so wie isch mid ihm, der bringd viel Drauwe. Ja, ohne misch kennd ihr nix mache. Wer ned mid mir zesamme bleibd, der werd weggeworfe wie e abgschniddeni Reb un vederrd. So Rewe wern gsammeld un ins Feier geworfe, wu se vebrenne. Wann ihr mid mir zesamme un moi Worde in eisch lewendisch bleiwen, kennd ihr de liewe Godd um alles bidde, was ihr wolld un ihr wern’s krie. Moin Vadder werd veherrlischd, weil ihr viel Drauwe bringen un moi Jinger wern.